Sunday, February 21, 2016

Ñalgu Winndere Ɗemngal Neeniwal

 Ŋam mawnin'de Ñalngu Winndere Ɗemngal Neeniwal, eɗen ngartira winndannde men nde mbinndunoɗen rawane ndeya.
E nder batu mum jooɗinoongu e lewru jolal (novembre) 1999, UNESCO (Fedde Ngootaagu Dowlaaji ngam Nehdi, Ganndal e Pinal) nonondiri e waɗtude 21 colte Nyalngu Winndere Ɗemngal Neeniwal. Tuggude e hitaande 2000 nyalngu ngu ene mawninee e nder leyɗeele aduna ɗe kala. Fayndaare UNESCO ko hirjinde e paamgol darnde ɗemngal e nder pinal aadee.Ɗemngal ko kuwtorgal ɓurngal doolnude e hatojineede ngam deengol donaaɗi e ƴellitgol pinal aade. Kuwtorogol ɗemngal neeniwal ngam nehde sukaaɓe lenyol e ƴellitde ganndal ko jojjannde kala lenyol.
                                                        Iwdi 21 Colte
Hayso tawii ko e hitaande ujunnaaje ɗiɗi, 21 Colte wonti nyalgu winndereyankeewu ne, e ngu mawnintenoo to leydi Bangladesh gila e hitaande 1957, ngam siftorde tato e almuudɓe maɓɓe jaaɓi-haaɗtirde ɓe polis Pakistan fellunoo e oon nyalawma taw ene mbaɗa seppo ngam naamnaade keɓtinegol ɗemngal Bengal e ɓaɗtugol ɗum ɗemngal lawakeewal. 
                                                                                                                                                                   
 E nder teemedannde sappo e jeenaɓere (t.19ɓere) ko adii nde leyɗeele ganndiraaɗe hannde Pakistan e Bangladesh ɗe ceertata e leydi Indo, mawɓe  juulɓe ɓe e annduɓe mum en ene ndaraninoo  ƴellitgol ɗemngal Urdu e haɓanaade yoo ngal wontu ɗemngal kuwtorgal hakkude juulɓe Indo, kono juulɓe haalooɓe ɗemngal Bengal en ɓe wonaa noon njiyri. Ɓe kolliri hayso e ɓe njiɗi ngootaagu juulɓe Indo ne, ɓe ngonaa jaɓooɓe woppude neeniwal maɓɓe ene maaya. Annduɓe maɓɓe ko wayno Khan Bahadur (1873-1965) e dewbo biyeteeɗo Rouqui (Rugiya) Sakhwat Hussain (1880- 1932) cuɓii kanum en winndude e ɗemngal Bengal. Ko ndeen dillere saabi jibineede fedde maɓɓe wiyeteende Muslim Shahittya Shamaj walla Muslim Literary Society e ɗemngal Engele. Fedde ndee waɗi mooɓondiral mum gadanal nyalnde 27 e 28 lewru Colte hitaande 1927.E nder mooɓondiral he annduɓe ɓe caakti heen wallifooji e jaribooji baɗanooɗi ngam hollirde ɗemngal Bengal ene waawi won’de ɗemngal janngirngal e kuwtorogal e kala fannu nguurndam.
  Natal  Monimaa sahodinɓe Jaaɓi-haɗtirde Dhaka, Bangladesh
  E hitaande 1947, Pakistan seerti e Indo, heɓi hoore mum kono diiwaanuji ɗiɗi ɗi, Fuɗnaange Pakistan (Bangladesh) e Hiirnaange Pakistan ndonki faamondirde sabu caɗeele pinal e ɗemngal. E hitaande 1948 laamu Pakistan feenyini kuwgal biyngal ko ɗemngal Urdu tan gootal woni lawakeewal leydi Pakistan. Yimɓe Fuɗnaange Pakistan, ɓe keeweendi mum en ko ɗemngal Bengal kaalata, calii ngaal kuwgal. Ɗuum jibini dillere mawnde e nder leydi he. Laamu ngu haɗi kala seppo walla dente-dingaral. Almudɓe Duɗal Jaaɓi-haaɗtirde Dhaka e dawrugolyankooɓe Fuɗnaange Pakistan caalii ɗowtaade ndeen haɗde ɓe njuɓɓini seppo nyalnde 21 Colte 1952. Laamu nguu ne, neldi soldateeɓe e alkateeɓe njani e maɓɓe, pelliɓe, mbari e maɓɓe almudɓe tato. Dillere ndee ɓeydii mawnude haa sari e nder leydi hee kala. Fotde duuɓi keewɗi ndeen dillere ɗemɗeyankeere ene jaali e nder leydi he haa e 1956 laamu Pakistan jaɓi heɓtinde ɗemngal Bengala e waɗtude ɗum lawakeewal. Kono ndeen uure sellaani sabu ko kanum rewi haa e hitaande 1971 Fuɗnaage Pakistan heɓi ndimaagu mum wonti leydi, wiyaa Bangladesh. Gila e ndeen hitaande 1952, kala nde 21 Colt arti, e ɓe mawninatnoo ɗum kadi  ɓe inniri ɗum nyalawma neeniwal.
   

2 comments:

  1. Ŋam mawninde Ñalngu Winndere ngam Ɗemngal Neeniwal(21 Colte/ February), eɗen ngartira ɗoo winndande men yawtunde. 21 Colte ko ñalawma mo kala ngenndiyanke paarnortooɗo ɗemngal mum foti mawninde.

    ReplyDelete
  2. Hannde kadi ko Ñalgu Winndere ngam Ɗemngal Neeniwal. Mi teddinirii ɗum kala pullo pasniiɗo hoore mum, jiɗɗo ɗemngal mum, haa ɓuri teeŋtude noon e daraniiɓe ngal he kala mbaiydi. Yoo Wuur Neenewal am Pulaar! Yoo Wuur ɗemɗe ngenndiije Afrik!

    ReplyDelete

Rokku yiyannde ma